عشق الروح

معلش يا طنط لو بتصل في وقت مش مناسب بس اتصلت ب ليلي كتير و مش بترد فقلقت عليها سميرة ... لا حبيبي انت تتصل اي وقت .. ليلي جت من ساعتين كدة و دخلت نامت علي طول ولسه مصحيتش لحد دلوقتي ... تحب اصحيهالك ؟ رامي ... لو ينفع يبقي شكرا جدا يعني سميرة ... حاضر خليك معايا ثواني دخلت سميرة ل ليلي سميرة ... ليلي حبيبتي اصحي رامي علي التلفون عايز يكلمك وانتي بقالك كتير نايمة ليلي بنوم ... هي الساعه كام ياخالتو سميرة ... داخله علي ستة اهو يلا خدي كلمي رامي ولما تخلصي قومي عشان نتغدي سوا هزت ليلي دماغها و خرجت سميرة ليلي بصوت مخنوق... الو رامي كشر ... ينفع يعني عشان اكلمك الف عليكي كل دا اتصل ب فرح و خالتك ؟ فين تلفونك ؟ مش بتردي عليه ليه ؟ ليلي عينيها دمعت كانت متخيلة اوي ما هيكملها هيعتذرلها لكن دا متصل يكمل خناق معاها رامي بضيق ... مش بتردي ليه ؟ متصل اكلم نفسي انا ؟ ليلي بصوت باكي ... ا التلفون كان صامت م مسمعتوش كنت نايمة رامي سكت ثواني خد نفس وحاول يهدي نفسه رامي بهدوء ... ليلي انا اسف مقصدش اتعصب عليكي انا .. انا بس فكرت انك مش عايزة تردي عليا ودا ضايقني جدا خلاص بقى يا حبيبتي مش قادر احس ان انا سبب في دموعك والله حقك عليا ما تزعليش ليلي ببكاء ... انت اتعصبت عليا الصبح وانا كنت متصله اطمئن عليك عشان قلقت ودلوقت برده بتتعصب عليا وانا ما عملتلكش حاجه كل ده عشان قلقانه عليك وعايزه اعرف مالك وليه خرجت من عنده كنت في الحاله دي رامي ... اسف بقى خلاص يا حبيبتي ما تزعليش لكي عليا يا ستي بكره الصبح ان شاء الله هاجي افطر معاكي ونشرب القهوه سوا واحكي لك كل حاجه تمام بس ممكن دلوقتي حبيبي يقوم يتغدى وبعدين يرجع يكلمني تاني اطمئن أن صوتك بقى كويس والصبح نتكلم في اي حاجه انتي عايزاها ليلي ... وانا هاقعد للصبح كده قلقانه ومش عارفه انت كان مالك رامي ... اول مره اعرف انك فضوليه صفه جديده دي ولا ايه ليلي .. فضوليه معاك انت بس انا فعلا قلقانه عليك يا رامي وعايزه اعرف في ايه رامي ... طب ممكن تقومي تتغدي وتدي لخالتك التليفون بتاعها وبعد كده نتكلم انا وانتي واحكي لك كل حاجه يا ستي بلاش مش هاستنى لبكره عشان ما تزعليش مني ممكن ليلي ... وانت بقى اصلا تغديت ولا لا رامي ... لا انا جيت نمت وقمت اهو باعمل قهوه وهاشربها ما ليش نفس خالص صدقيني ليلي كشرت ... خلاص يبقى انا كمان مش هاكل لو انت هتتغدى انا هاتغدى لو انت مش هتتغدى انا مش هاكل وخليني بقى افضل قاعده كده وانا جعانه رامي ... مع اني مش قادر يا حبيبي وكنت باعمل القهوه بس حاضر هاقفل على القهوه اهي وهاكل اي حاجه سريعه كده وبعدين ارجع اشرب القهوه واكلمك اتفقنا ليلي بحب ... اتفقنا يلا سلام مؤقت رامي ... سلام حبيبتي رامي فعلا كلمها وحكلها كل حاجه حصلت .. حكى لها ان هو كان متضايق عشان توبا كان حاسس ان شاب كويس باخلاقه ولسه صغير والمستقبل كان قدامه كبير ضيع نفسه عشان خاطر واحده ما تستاهلش .. حكى لها ان هو قد ايه حس بحكمه ربنا ان الحادثه دي تحصل له في التوقيت اللي كان بيفكر فيه يخطب فعلا مريهان رسمي زي ما يكون ربنا مش كان بيعميه ده كان بينور بصيرته علشان يشوف كل حاجه على حقيقتها ويبعد عنه اي شر ويقربه من حب عمره الحب اللي هيفضل طول عمره بيحمد ربنا انه خلاه يشوفه يلاقيه ... قفله مع بعض و هما في حاله ثانيه خالص غير اللي تكلموا فيها .. هي فرحانه ان كل حاجه بيقدرو يقولوها لبعض وخصوصا هي انها ما بقتش تكتب مشاعرها ولا تخبيها ولا بقت ترجع تعبر بالورقه والقلم زي زمان ... هو كمان كان مبسوط بالشخصية الجديدة اللي بتظهر علي ليلي وصفه الفضوليه اللي بقت معاه هو وبس ❈-❈-❈ الايام اللي بعد كده كلها عدت تحضيرات في الشقه وتحضيرات للفرح وتجهيزات وتقفيلات للشغل كل واحد فيهم كان بيقفل شغله عشان يعرف ياخذ اجازه يستمتع فيها مع حبيبه واخيرا جاء اليوم اللي هم مستنينه يوم الفرح فرح وليلى كان جواهم حزن شويه ان والدهم مش موجود معاهم ليلى ما حستش انها محتاجه مامتها قوي لان سميره كانت اقرب لها من مامتها بكثير